تاند (شنبه د جوزا ۱۵) د افغانستان د بهرنیو چارو وزیر محمد حنیف اتمر له خپل ترکمن سیال رشید میردوف سره د اتو لویو پروژو په هکله خبرې پیل کړې.
د افغانستان د بهرنیو چارو وزارت وايي چې دواړو لوریو نن په هرات ولایت کې د تاریخي او فرهنګي روابطو په هکله خبرې وکړې او د دواړو هېوادونو ترمنځ یې د سیاسي او اقتصادي همکاریو او سیمه ییز پیوستون پر پراختیا ټینګار وکړ.
د دې وزارت په اعلامیه کې راغلي چې حنیف اتمر او رشید میردوف په دې غونډه کې د ګازو د لېږد (TAPI)، د برېښنا د لېږد (TOP)، رېل پټلۍ، د مرمر ډبرې د صادراتو، سوداګرۍ او ټرانزیټ، فرهنګي همکاریو، د افغانستان او ترکمنستان ترمنځ د دوه اړخیزو اړیکو، د افغان سولې پروسې او د کورونا پر وړاندې د مبارزې په هکله خبرې وشوې.
د اعلامیې له مخې د ترکمنستان د بهرنیو چارو وزیر هیله څرګنده کړه چې د نن ورځې ناسته به د افغان سولې او دواړو هېوادونو ترمنځ د اړیکو د پراختیا لپاره ګټوره ثابته شي او د افغانستان او ترکمنستان ترمنځ به د اقتصادي، سوداګریزو، فرهنګي او د سیمې هېوادونو ترمنځ به سیمه ییز پیوستون ته زمینه برابره کړي.
په اعلامیه کې دغه راز راغلي چې دواړو لوریو د بهرنیو ځواکونو تر وتلو وروسته په افغانستان کې د عشق آباد په رول نظرونه سره تبادله کړل.
د افغانستان د بهرنیو چارو وزارت وايي چې ددې پروژو په هکله د بحثونو پایلې به وروسته شریکې شي.