تاند (چهارشنبه، د جوزا ۱۲) د روغتیا نړیوال سازمان وایي، چې له کورونا وبا سره د مبارزې په موخه یې د چین تولید شوی یو بل واکسین هم د وېش لپاره تائید کړ.
یاد سازمان وایي، چې دغه واکسین سینووک نومېږي.
د روغتیا نړیوال سازمان وایي دا واکسین هم باوري دي او د کو واکس په پروګرام کې به د نړۍ پر هېوادونو ووېشل شي.
د چین لومړنی تایید شوی واکسین سینوفارم نومېږي، چې هغه هم د روغتیا نړیوال سازمان په کو واکس پروګرام کې شامل شوي دي.
د معلوماتو له مخې کو واکس پروګرام د روغتیا نړیوال سازمان له لوري د کورونا ضد واکسینو د وېش په موخه جوړ شوی، چې موخه یې په عادلانه توګه د نړۍ هېوادونو ته د دغه واکسینو رسول ښودل شوي دي.
د روغتیا نړیوال سازمان داسې مهال دا واکسین د وېش لپاره تائیدوي، چې په دې وروستیو کې په ګڼو هېوادونو کې د کورونا وبا درېیمې څپې زور اخیستی او په چټکۍ د خپرېدو په حال کې ده.
هند بیا یو له هغو هېوادونو دی، چې د کورونا درېیمې څپې تر بل هر هېواده زیات ځپلی دی.