تاند ( چهارشنبه، د جوزا ۱۲) په کابل ښار کې د تېر ماښام په دوو پرلپسې چاودنو کې د مرګ ژوبلې ارقام ۲۲ ته لوړ شو.
د کورنیو چارو وزارت وايي، لومړنۍ چاودنه په شاوخوا ۷ بجې د ولسمشر د سلاکار محمدمحقق کور ته نژدې د اهل بیت جومات مخته وشوه او دوهمه چاودنه بیا په دوهمه امنیتي حوزه کې په درملتون ګولايي کې د شپې په ۸ بجې وشوه او بیا هم یو کاسټر لایني موټر پکې په نښه شو.
د امنیتي چارواکو د وروستیو معلوماتو پر اساس په یادو دواړو چاودنو کې ۱۰تنه وژل شوي او ۱۲ نور ټپیان دي.
د کورنیو چارو وزارت وایي چې وژل شوي او ټپیان ټول ملکي وګړي دي.
د دواړو چاودنو مسوولیت کومې ډلې په غاړه نه دی اخیستی.
دغه راز یوه بله چاودنه د کابل په شمال کې شوې، چې د برېښنا یوه پایه یې نړیولې او له همدې امله د کابل برېښنا پرې شوې ده.