تاند ( دوشنبه، د جوزا ۱۰ مه ) د افغانستان ملي دفاع وزارت وایي، افغان کمانډو ځواکونو د کندز ښار څلورمې حوزې اړوند سیمه کې د عملیاتو پر مهال د وسلوالو طالبانو زندان مات کړی دی.
له دغه وزارت څخه په خپره شوې خبرپاڼه کې راغلي چې تېره شپه د کمانډو ځانګړو ځواکونو د کندز ولایت مرکز اړوند په «قوش تپه» کلي کې د وسلوالو طالبانو په یو زندان عملیات تر سره کړل.
خبرپاڼه وایي، د دغو عملیاتو په ترڅ کې د طالبانو له زندانه ۵ تنه آزاد شول.
د خبرپاڼې له مخې، د یادو عملیاتو په ترڅ کې ۱۲ تنه وسلوال طالبان ووژل شول او همدا راز ۸ تنه نور یې ژوندي ونیول شول.
ملي دفاع وزارت زیاتوي همدا راز په دې عملیاتو کې یوه اندازه وسلې او مهمات هم د کمانډو ځواکونو لاسته لوېدلي او ۱ پټنځای له منځه یوړل شو.
د ویلو وړ ده چې د روانې جوزا میاشتې په پنځمه نېټه هم د افغانستان ملي دفاع وزارت په بغلان ولایت کې د طالبانو له یوه بل زندان څخه د ۶۲ تنو بندیانو ازادولو خبر ورکړی و.
دا په داسې کې ده چې تر دې مخکې هم افغان ځواکونو د افغانستان په بېلابېلو ولایتونو کې د عملیاتو پرمهال لسګونه زندانیان د طالبانو له زندانونو څخه خلاص کړي دي.