تاند- سپېس ایکس د سټارلینک ۶۰ سپوږمکۍ د مځکې مدار ته یووړې او په دې ډول یې په فضا کې د انترنیټ لپاره د سپوږمکیو شمېر یوزرو ۷۳۷ ته ورسېد.
سپېس ایکس په فالکن ۹ توغندي وروستۍ ۶۰ سپوږمکۍ ولېږلې.
له توغېدو ۹ دقیقې وروسته د توغندي لومړۍ برخه مځکې ته راوګرځېده.
دغه توغندی، چې مخکې یې هم دوهمه برخه یو ځل فضا ته توغول شوې وه، په فلوریدا کې د کیپ کاناورال له فضايي مرکزه د مځکې مدار ته لاړ. دا په روان ۲۰۲۱ م کال کې شپاړسم ځل دی چې سپېس ایکس توغندی توغول کېږي.
له بلې خوا دا په ۴ اوونیو کې د سټارلینک سپوږمکیو د لېږلو څلورم عملیات دي.
حاضردمه سټارلینک پروژه په ازمېښتي ډول د ځینو سیمو لپاره چټک انترنیټ برابروي.
په پام کې ده چې له دې لارې د نړۍ ټولو سیمو ته، که هغه غر وي یا سمه، چټک انترنیټ برابر شي.