تاند(جمعه، د جوزا ۷) په سوریه کې د ټاکنو تر اعلان وروسته د دغه هېواد ولسمشر بشار الاسد یو ځل بیا د نوي ولسمشر په توګه وټاکل شو.
د یاد هېواد د ټاکنو کمېسیون تېره ورځ اعلان کړی چې بشار اسد په ترسره شوو ټاکنو کې ۹۵ سلنه رایې تر لاسه کړې دي.
د هغه دوو سیالانو محمود مرعي او عبدالله سلوم تر ټولو کمې رایې خپلې کړې دي.
د سوریې هېواد پارلمان اعلان کړی چې په ترسره شوو ټاکنو کې ۱۴ میلیونه په شرایطو برابرو کسانو ګډون کړی و.
په همدغه ترتیب به بشار الاسد د راتلونکو اوو کلونو لپاره نور هم د سوریې د ولسمشر په توګه خپلې دندې ته دوام ورکړي او که د یاد هېواد اساسي قانون بدل نه شي، دا به یې وروستی ځل وي.
بشارالاسد لکه د خپل پلار په شان د سوریې شاهي او میراثي جمهور رئیس دی . پلار یې ډګروال حافظ الاسد د 1971 کال د فبروري له 22 تر 2000 کال د جون لسمه پورې پوره دیرش کاله د سوریې جمهور رئیس وو او له 1970 تر 1971 کال پورې د هغه هېواد صدراعظم وو.
د حافظ الاسد زوي بشار الاسد د 2000 کال د جولای له 17 تر اوسه او بیا د راتلونکو 7 کلونو لپاره د هغه هېواد جمهور رئیس پاته شو .