تاند ( پنج شنبه، د جوزا ۶مه) د ننګرهار ولایت چارواکي وايي، نن سهار شاوخوا ۸ نیمې بجې د جلال اباد ښار اتمې ناحیې اړوند بهسودو پله ته څېرمه د کامې ولسوالۍ د ولسوال پر موټرمقناطیسي ماین چاودنه کړې.
د والي ویاند عطاالله خوږیاڼی وایي، په دې چاودنه کې د ولسوال شریف الله فضلي په ګډون د ده یو ساتونکی او یو ملکي وګړی ټپيان شوي دي.
خوږیاڼی زیاتوي، دا چاودنه د ولسوال پر موټر دندې ته د تګ پرمهال شوې ده.
خو بل لورته عیني شاهدان بیا وایي، چې په چاودنه کې ولسوال او دوه ساتونکي یې ټپیان شوي دي.
عیني شاهدان زیاتوي، په سیمه کې ګڼ عام خلک هم وو خو بل چاته زیان نه دی رسېدلی.
د ټپيانو د روغتیاي وضعیت په اړه تر اوسه څه نه دي ویل شوي.
د دې چاودنې مسوولیت هم تر اوسه چا پر غاړه نه دی اخیستی.