تاند(شنبه، د جوزا۱) ازبکستان لېواله دی چې د منځنۍ اسیا او جنوبي اسیا ترمنځ د افغانستان له لارې رېللار جوړه کړي.
دا هیواد وايي چې په دې پروژې کې ګډون ته نړیوال بانک او د امریکا د مالي همکارۍ د نړیوالې پراختیا ادارې لېوالتیا ښوولې ده.
د ازبکستان د پانګونې او بهرنۍ سوداګرۍ د وزارت په وینا نړیوال بانک د افغانستان د مزارشریف او د پاکستان د پېښور ښار ترمنځ د رېللار د جوړولو لپاره د ډیزاین تخنیکي ملاتړ او مالي مرستې ته چمتووالی ښوولی دی.
وروسته له دې چې د ازبکستان د پانګونې او بهرنۍ سوداګرۍ وزارت چارواکو د اروپا او منځنۍ اسیا لپاره د نړیوال بانک له مرستیال رييسې انا بیردي سره خبرې وکړې، دوی وویل چې د افغانستان له لارې له پاکستان سره دا نښلونکې پروژه ۵ ملیارد ډالره لګښت لري.
دا رېللار، چې ۵۷۳ کیلومتره اوږده ده، د کال د ۲۰ ملیون ټنه مال د ترانزیت ظرفیت لري.
دا رېللار به د ازبکستان، افغانستان، پاکستان او هندوستان ترمنځ ارتباط ټینګ کړي.
دا پروژه درې مهم امتیازونه لري. لومړی دا چې د منځنۍ اسیا له لارې به د جنوبي اسیا او اروپا ترمنځ د مالونو د ترانسپورت کېدو وخت او لګښت خورا کم کړي.
دوهم دا چې دا نوې (ترانس افغان) رېللار به، چې د پاکستان له کراچۍ، بن قاسم او ګوادر سمندري بندرونو سره وصل کېږي، له منځنۍ اسیا څخه د مالونو صادرات خورا ډېر کړي.
درېیم؛ دا لار به د اسیا او اروپا ترمنځ په ارتباط کې د سیمې تاریخي رول یو وار بیا د مځکې له لارې ژوندی کړي.
د سیمې په کچه د پراخو ارتباطاتو په لړ کې روسیې ازبکستان ته د روسیې – هند د رېللار د جوړېدو وړاندیز کړی دی. دا دهلېز به له ازبکستان او افغانستان څخه تېرېږي او روسیه له هند سره وصلوي.
د روسیې او زبکستان د رېللارو چارواکو روانه اوونۍ په دې موضوع خبرې وکړې.