تاند (پنجشنبه د ثور ۳۰) د غور سیمه ییز چارواکي وايي چې وسله والو طالبانو د غور-هرات پر لویه لاره درې تنه مسافرین وژلي دي.
د غور د والي ویاند زلمي کریمي ویلي چې وسله والو طالبانو تېر مازدېګر د غور – هرات ترمنځ لارې په بند ماین سیمه کې دغه مسافر له موټرو ښکته کړي او د کورنیو په مخ کې یې په ډزو وژلي دي.
د نوموړي په خبره چې امنیتي ځواکونو دغه مړي د غور ولایتي روغتون ته انتقال کړي دي.
طالبانو بیا دا ادعا رد کړې ده.
نږدې درې اونۍ مخکې هم پنځه تنه مسافر د غور- کابل پر لاره د وسله والو له خوا وژل شوي و.
د یو بل خبر له مخې سیمه ییز امنیتي چارواکي وايي چې هلمند کې د سړک غاړې ماین چاودنې ۱۱ تنه وژلي دي.
دغه پېښه د هلمند د مرکز لښګرګاه ښار اړوند د بشران په سیمه کې د ولسي وګړو په سراچه موټر شوې ده.
ځايي امنیتي مسؤلین وايي، د ولسي وګړو سراچ موټر د نادعلي ولسوالۍ له ناقل آباد سیمې لښکرګاه ته په لار و، چې د بشران په سیمه کې پرې د سړک د غاړې خښ شوي ماین چاودنه کړې.
د امنیتي چارواکو په وینا په دغه پېښه کې د ښځو او ماشومانو په ګډون ۱۱ تنه وژل شوي، چې ټول ولسي وګړي دي.
امنیتي چارواکي وايي، دغه ماین د طالبانو له خوا خښ شوی و خو طالبانو تر اوسه په دې هکله څه نه دي ویلي.