تاند(سې شنبه، د ثور۲۸) د امریکا مرکزي قومانداني یا سنټکام وايي، له افغانستانه تراوسه پورې په سلو کې ۲۰ امریکايي پوځیان وتلي دي.
سنټکام وايي، د امریکا د ولسمشر جو بایډن د اپریل د ۱۴ نېټې له اعلان سره سم، له افغانستانه د پاتې امریکايي پوځیانو د ایستلو رسمي بهیر د مې په لومړۍ پیل شوی او د سپټمبر تر ۱۱ پورې بشپړېږي.
د دې قوماندانۍ له اټکل سره سم، د ځواکونو او وسایلو د ایستلو پروسه تراوسه د ۱۳ او ۲۰ سلنې ترمنځ بشپړه شوې ده.
دې قوماندانۍ مخکې ویلي و چې هره اوونۍ به د ځواکونو د ایستلو په اړه وروستي معلومات خپروي.
سنټکام وايي، د امریکا پوځ تراوسه پورې د (c-17) باري یا ترانسپورتي الوتکو ۱۱۵ جوپې وسایل وړي او ۵ زره وسیلې یې ویجاړې کړي دي.
سنټکام همداراز وايي، د امریکا پوځ تراوسه پورې افغان ځواکونو ته ۵ پوځي اډې سپارلې دي.
په همدې حال کې په بګرام کې مېشت افغانان وايي چې امریکايي پوځیان د ویجاړو کړیو وسایلو/ وسلو له ۲۰ تر ۳۰ کانتینرونه د بګرام له هوايي اډې راباسي او پلوري یې.
خلک وايي چې امریکايي پوځیانو د ملیونونو ډالرو وسایل په بګرام کې پر افغانانو پلورلي دي.
له موټرو رانیولې، د وسلو تر ټوټو، میزونو، کوچونو او الماریو پورې هرراز وسایل په بګرام کې پلورل کېږي.
په همدې حال کې د افغانستان دفاع وزارت وايي چې امریکايي پوځیان به د یو ملیارد ډالرو په ارزښت وسایل/ وسلې وروسپاري.