تاند ( سه شنبه، د ثور ۲۸مه) د خوست امنیتي سرچینې وایي، چې تېره شپه ناپېژاندو وسله والو په دې ولایت کې د یوې کورنۍ څلور غړي وژلي دي.
ځايي خلک وایي، دا پېښه د متون په رش کلي کې پېښه شوې او په وژل شويو کسانو کې یو ماشوم هم شامل دی.
د پېښې لامل لا نه دی معلوم خو د ځایي خلکو په خبره دغو کسانو له هېچا سره دښمني نه لرله او نه یې هم په حکومت کې دنده درلوده.
دوی له حکومت نه د دې پېښې د عاملینو د نیولو غوښتنه کوي.
د خوست چارواکو تر اوسه په دې اړه څه نه دي ویلي.
د دې پېښې مسوولیت هم تر اوسه چا نه دی منلی.