تاند ( یکشنبه، د ثور ۲۶ مه ) سرچینې وایي، د لغمان ولایت د دولت شاه ولسوالي امنیه قوماندان عبدالظاهر د افغان ځواکونو له لوري په توغول شوي توغندي ووژل شو.
د لغمان والي رحمت الله یارمل هم دا پېښه تایید کړې ده.
والي رحمت یارمل زیاته کړې چې د دولت شاه ولسوالي امنیه قوماندان عبد الظاهر نن له غرمې وروسته د افغان ځواکونو له لوري په توغول شوې مرمۍ لګېدلی او وژل شوی دی.
والي وایي چې افغان ځواکونو د طالبانو پر خوا د توپ مرمۍ ویشتله چې د تخنیکي ستونزې له امله مرمۍ د امینه قوماندان خوا کې لګېدلې او چاودنه یې کړې ده.
نوموړي زیاته کړې چې دې پېښه کې په خپله امنیه قوماندان له یو ساتونکي سره یو ځای وژل شوی دی.
د لغمان والي دغه راز زیاته کړې چې سیمه کې وضعیت د اندېښنې وړ نه دی او جګړه نه شته دی.
دا په داسې حال کې ده چې د وسلوالو طالبانو له لوري د اختر په مناسبت د اعلان شوي اوربند تر پای ته رسېدو وروسته یو ځل بیا په هېواد جګړو زور کړی او په ترڅ کې یې د هېواد له ګوټ ګوټه د افغان ځواکونو او طالبانو د مرګ ژوبلو راپورونه ورکړل شوي دي.