تاند(پنجشنبه، د ثور۱۶) سعودي عربستان غواړي چې د کورونا وبا د مخنیوي لپاره سږ کال بیا بهرنیانو ته د حج د مراسمو د ادا کولو اجازه ورنه کړي.
سعودي عربستان تېر کال هم د کورونا وایرس د خپرېدو په خاطر بهرنیو زیارت کوونکو ته د حج د مراسمو اجازه ورنه کړه.
حج د سعودي عربستان د عایدو یوه مهمه سرچینه ګڼل کېږي او له همدې کبله دې هیواد غوښتل چې سږ کال بهرنیو زیارتوالو ته د حج ادا کولو اجازه ورکړي خو په وروستیو کې د کورونا وبا نوې څپې د سعودي عربستان په شمول د سیمې ګڼ هیوادونه سخت اندېښمن کړي دي.
دې نوې څپې په ځانګړي ډول هند سخت ځپلی او اوس په افغانستان او پاکستان کې هم د کورونا دا نوې بڼه موندل شوې ده.
د کورونا نوې بڼه ژر خپرېږي او شدت یې زیات دی.
سعودي عربستان ویلي چې په دې غور کوي چې یوازې هغو سعودیانو یا په دغه هیواد کې مېشتو بهرنیانو ته د حج کولو اجازه ورکړي چې واکسین یې کړی وي یا یې کورونا تېره کړې وي.
دې هیواد تراوسه پورې وروستۍ پرېکړه نه ده کړې.
د رویټرز خبري اژانس د راپور پر اساس، د کورونا وبا تر خپرېدو مخکې هر کال سعودي عربستان ته د کال دوه نیم ملیونه زیارتوال د حج لپاره تلل چې له دې درکه سعودي د کال ۱۲ ملیارد ډالره ګټه کوله.
د حج د عوایدو پر کمېدو سربېره په نړۍ کې د تېلو د بیې ټیټېدو هم د سعودي عربستان پر اقتصاد ناوړه اغېز کړی دی.
تېر کال سعودي چارواکو غوښتل چې د ورتېرو کلونو دوه برابره زیارتوال ومني خو کورونا وبا سبب شوه چې بهرنیانو ته اجازه ورنه کړي چې دغه هیواد ته د حج د ادا کولو لپاره ورشي.
د سعودي عربستان د ولیعهد محمد بن سلمان د اقتصادي پلان له مخې د حج د زیات کوونکو شمېر په لومړي پړاو کې ۵ ملیونو او وروسته ۱۵ ملیونو ته رسول کېږي.
سلمان هیله لري چې د دې پلان په عملي کولو سره به نه یوازې د کورونا وبا د دورې د زیانونو وټ کټ وباسي بلکې د حج له درکه به د سعودي عربستان عواید له ۵۰ تر ۶۰ ملیارد ډالرو ته ورسوي.