تاند ( چهارشنبه، د ثور ۱۶) د کوچني اختر په رارسېدو سره د پلازمېنې د کابل په ګډون د ډېری ولایتونو اوسېدونکي د وچو میوو او خوراکي توکو د بیو له لوړوالي سر ټکوي.
دوی وایي، د کوچني اختر په را رسېدو سره په بازارونو کې د وچو میوو تر څنګ د خوراکي توکو بیې د تېر په پرتله ډېرې لوړې شوي او ګڼ خلک د اقتصادي ستونزو له کبله نه شي کولای ورته رسیدګي وکړي.
خلک وایي، هر کال د اختر د ورځو په رارسېدو سره هټۍوال په خپل سر له کوم دلیل پرته د خوراکي توکو په تېره بیا د وچو میوو بیې په بې ساري ډول لوړوي.
دوی دغه راز زیاتوي چې سوداګر د ازاد بازار د اقتصاد څخه په استفادې توکي په لوړه بیه پلوري چې جدي ستونزې یې راپیدا کړي دي.
د کابل ښار یو تن اوسېدونکی مسید احمد وایي چې د وچو میوو تر څنګ د خوراکي توکو بیه د تېر کال په پرتله ډېره لوړه شوې ده چې په وینا یې د ده په ګډون ډېرې کورنۍ یې د اخیستلو توان نه لري.
نوموړی تاند سره په خبرو کې وایي؛ اړوند ارګانونه باید په جدي توګه د خوراکي موادو د کیفیت ترڅنګ د بیو د کنټرول په برخه کې جدي اقدامات ترسره کړي.
ورته مهال د ننګرهار ولایت جلال اباد ښار اوسیدونکي هم هلته د نرخونو له لوړوالي شکایت کوي او وایي د هېوادوالو وروستي اقتصادي وضیعت ته په کتو باید د حکومت ترڅنګ هټۍ وال او سوداګر هم دې برخې جدي پام وکړي.
صفي الله چې د جلال اباد ښار اوسیدونکی دی تاند سره خبرو کې زیاتوي: ( دا منو چې د نرخونو کنټرول او څار د ښاروالي او حکومت دنده ده او دې برخه کې پاتې راغلي؛ مګر زموږ دوکاندار او سوداګر هم د دې وطن بچي دي له ټولو حالاتو خبر دي که ۵۰% مو ښاروالي او حکومت ګرم دی همدومره سوداکر او هټۍ وال هم دي.)
نوموړی وایي، له ټولو هېوادوالو او اړوندو خلکو غواړي څو د خپلو وطنوالو پر حال رحم وکړي او د احتکار په ځای له انصافه کار واخلي.
مسوولو چارواکو تر اوسه په دې اړه څه نه دي ویلي خو تر دې درې اوونۍ وړاندې د افغانستان د صنعت او سوداګري وزارت چارواکو ډاډ ورکړی و چې د روژې په مبارکه میاشت کې به د خوراکي توکو نرخونه ثابت پاتې شي.
د دغه وزارت ویاند فواد احمدي ویلي وو چې د صنعت او سوداګري وزارت په مشري یو ګډ کمېسیون جوړ شوی چې د کابل په بازارونو کې به د خوراکي توکو بیې کنټرولوي.
دا په داسې حال کې ده چې هر کال د اخترونو په رارسېدو سره هېواد کې ډیری هټۍوال او سوداګر په خپل سر نرخونه لوړوي او د خلکو کمزوري اقتصاد ته په کتو، ډېری کورنۍ د اختر لپاره د اړینو خوراکي توکو او وچو میوو د پیرولو توان نه لري.