تاند- اوس د ټولو انسانانو تر نیمايي زیات په ښارونوکې اوسي او د ښارونو د پراخېدو بهیر په چټکه دوام لري.
په نړۍ کې له کلیو څخه ښارونو ته د خلکو د کوچ بهیر اوس تر بل هر وخت ګړندی دی.
په ملیونونو انسانان، په ځانګړي ډول له پرمختیايي هیوادونو ښارونو ته ځي.
ښارونو ته د انسانانو په لېږد کې داسي چټکوالی پخوا نه و لیدلی شوی، له همدې کبله ملګروملتو په ۲۰۱۴ م کال د اکتوبر یودېرشمه د ښارونو ورځ ونوموله چې د ښاري کېدو یا د ښارونو د پراختیا په اړه عامه پوهاوی زیات کړي او پر دې تاکید وشي چې د ښارونو د پراختیا د ستونزو د مخنیوي لپاره همکاریو ته اړتیا ده.
د تازه راپورونو له مخې د نړۍ په سلو کې ۵۵۴ وګړي په ښارونو کې اوسي او اټکل کېږي چې تر ۲۰۵۰ پوري به نور خلک هم کلي پرېږدي او د ښارونو د نفوسو فیصدي به ۶۶ ته ورسوي.
د ملګرو ملتو له ارقامو سره سم، په ۱۹۵۰ م کال د نړۍ د ښارونو نفوس ۷۴۶ ملیونه و، په ۲۰۱۴ م کال د ښارونو نفوس ۳ ملیارده او ۹ سوه ملیون تنو ته ورسېد او په ۲۰۱۷ کې ۴ اعشاریه ۱ ته شو.
سره له دې چې تر نیمايي زیات انسانان اوس په ښارونو کې اوسي خو ښارونه د مځکې د کُرې یوازې یو فیصده خاوره تشکیلوي.
اوس په نړۍ کې ۲۸ دومره ستر ښارونه شته چې د هر یوه نفوس تر ۱۰ ملیونو زیات دی، حال دا چې ۱۶ کاله پخوا (۱۹۹۰) د دې ډول ښارونو، چې نفوس یې لس ملیونو ته ورسېږي، شمېر ۱۰ و.
د ملګروملتو د راپور له مخې، د جاپان پلازمېنه توکیو د نړۍ تر ټولو ګڼ نفوسه ښار دی. د دغه ښار نفوس ۳۸ ملیونه دی.
د نړۍ زیات نفوس په اسیا کې متمرکز دی، په دې لویه وچه کې د نړۍ د ټول نفوس په سلو کې ۵۳ اوسي، په اروپا کې ۱۴ فیصده او لاتینه امریکا کې ۱۳ فیصده انسانان اوسي.
واتیکان د نړۍ تر ټولو کم نفوسه دولت دی چې د ټولو وګړو شمېر یې ۵۰۰ تنه دی.
د یونسکو د خلاقو ښارونو د شبکې پر اساس د سعودي عربستان الاحسا د نړۍ تر ټولو خلاق ښار دی خو د ژوند د ستندرد او کیفیت له نظره په ۲۰۱۶ م کال کې د اتریش ویانا او د سویس زوریخ لومړی او دوهم مقامونه لري.