تاند( یک شنبه، د ثور ۵مه) پاکستان په دریمه شل اوریزه لوبه کې زمبابوې لوبډلې ته ماتې ورکړه.
دغه لوبه د زمبابوې په کوربه توب د هرارې په لوبغالي کې ترسره شوه.
د لوبې پچه پاکستان وګټله او پخپله یې توپ وهنه غوره کړه، چې په ټاکلو ۲۰ اورونو کې یې د ۳ لوبغاړو په سوځېدو ۱۶۳ منډې جوړې کړې.
محمد رضوان ۹۱ ناسوځېدلې او بابر اعظم ۵۲ منډې ترسره کړې.
د زمبابوې لورې جانګوي یو ځل بیا ۳ پاکستاني لوبغاړي وسوځول.
زمبابوې لوبډلې ټاکل شوی هدف پوره نه شو کړای او د ۷ لوبغاړو په سوځېدو یې یواځې ۱۴۱ منډې جوړې کړې.
زمبابوې لپاره مدوېري ۵۹ او مروماني بیا ۳۵ منډې جوړې کړې.
د یادونې ده، چې د دواړو لوبډلو ترمنځ د درېيو شل اوریزو لوبو د لړۍ لومړۍ لوبه پاکستان په ۱۱ منډو ګټلې وه، خو دویمه یې بیا د ۱۸ منډو توپیر بایللې وه.
د دې لوبې په ګټلو سره پاکستان د شل اوره لوبو لړۍ هم له زمبابوې وګټله.