تاند(چهارشنبه، د ثور ۱) د امریکا د مرکزي قومندانۍ قومندان او ډیپلوماټان له سیمه ییزو هېوادونو سره په ګډه د یوې داسې طرحې پر جوړولو بوخت دي چې پر بنسټ یې امریکا له افغانستان څخه د خپلو ځواکونو تر وتلو وروسته وکولی شي په سیمه کې خپل ځمکني او یو شمېر هوایي ځواکونه په افغانستان کې د ترهګریزو فعالیتونو پر وړاندې د عملیاتو لپاره وساتي.
د ایرفورس مګزین راپور ورکړی دی چې جنرال کینټ مکنزي د سنا جرګې د نظامي خدمتونو کمیټې ته په خبرو کې ویلي چې دوی له سیمه ییزو هېوادونو سره په ګډه د یوې پراخ بنسټه برنامې د جوړولو په هڅه کې دي څو له افغانستان څخه د ځواکونو تر وتلو وروسته د ترهګریزو ګواښونو د دفع کولو لپاره دغه هېواد ته نږدې یو شمېر سرتېري وساتي.
نوموړي زیاته کړې چې تر اوسه پورې یې د ځای په اړه پرېکړه نه ده کړې خو ټینګار یې کړی دی چې امریکا به له افغانستان څخه د ځواکونو تر وتلو وروسته هم دغه هېواد له اسمانه څاري او ترهګرو ته به په دغه هېواد کې د فعالیت اجازه ورنه کړي.
د امریکايي پوځ د مرکزي قومندانۍ قومندان د سرتېرو پر وتلو د اندېښنې څرګندولو تر څنګ د سولې په برخه کې د طالبانو پر ژمنتیا هم شک ښودلی دی.
نوموړي د امریکا د استازو مجلس د دفاعي کمېټې غړو ته په استماعیه غونډه کې د خبرو پر مهال ویلي په افغانستان کې لا هم د ترهګرۍ ګواښ شته دی، د بهرنیو ځواکونو د وتلو په صورت کې به جګړې شدیدې شي او طالبان ښایي خپلو هوکړو ته ژمن پاتې نه شي.
جنرال مک کینزي ټینګار کړی چې له افغانستان په اوسنیو شرایطو کې د سرتېرو ایستل خطرناک اقدام دی او ښايي القاعده شبکه له دې فرصت په استفادې یو ځل بیا نړیوالو ته ګواښونه جوړ کړي.
هغه همدا راز ویلي چې د احتمالي ګواښونو د ختمولو لپاره په افغانستان کې د امریکا استخباراتي ظرفیت هم کم دی.
مک کینزي وایي ژر به د افغانستان په اړه یوه طرحه جوړه کړي او پنټاګونه ته به یې وسپاري څو راتلونکی وضعیت له دې لارې مدیریت کړل شي.