تاند ( جمعه، د حمل ۲۰ ) د پکتیا مرکز ګردېز ښار کې د صرافۍ یو مجهز او عصري مارکېټ جوړ او رسمآ افتتاح شو.
د دې ولایت د صنایع او سوداګري خونې مسوولین وایي، ګردیز ښار کې د خصوصي سکټور د ۲۰ تنو سوداګرو له لوري د ۳ میلیونه امریکايي ډالرو په پانګونه د صرافۍ یو مجهز او عصري مارکېت افتتاح شو.
د پکتیا د صنایع او سوداګري خونې مشر نصیر عالمیار وایي، د صرافۍ دغه جوړ شوی مارکېټ ۲۵۰ دوکانونه لري او د سویل ختیځ زون په کچه له مجهزو او عصري مارکیټونو دی چې د سوداګري لازمې آسانتیاوې په کې موجودې دي.
نوموړی دغه راز زیاتوي چې افغانستان بانک هم کولای شي، په دې کې انټرنیټي بانکي سیستم ایجاد کړي.
د معلوماتو له مخې، یاد مارکېټ د دوه کلونو په موده کې د ۶ پوړونو په درلودلو سره په یو جریب ځمکه کې جوړ شوی دی.
د پکتیا د صنایع او سوداګرۍ خونې مسوولین زیاتوي چې دغه ماکیټ کې شلو سوداګرو پانګونه کړې ده.
په ګردیز ښار کې د صرافانو د یاد مارکیټ جوړیدو ته صرافان هم خوشاله دي او وايي، په دې سره به د دوی د کار و بار وړاندې شته ستونزې له منځه ولاړې شي.
د پکتیا د اقتصاد رئیس بهرام بهیر بیا د دې مارکېټ جوړېدل یو پرمختګ بولي او وایي دې سره به نور پانګوال هم دننه هېواد کې پانګونې ته وهڅول شي.
د پکتیا والي محمد حلیم فدايي هم سوداګرو، پانګوالو او دوکاندارانو ته د پوره همکارۍ ډاډ ورکوي، خو وایي، دا همکاري هغه وخت اغېزمنه تمامیږي، چې سوداګر او پانګوال هم له امنیتي او کشفي ادارو سره د ګواښونو د کتو پر مهال همکاري وکړي.
دا په داسې حال کې ده چې د کرونا وبا راتګ د افغانستان په ګډون د نړۍ په ډېرو هېوادونو کې خلکو ته سختې اقتصادي ستونزې جوړې کړې چې د پکتیا په ګډون د هېواد ډېر شمېر ولایتونو کې زرګونه ځوانان د بې کارۍ د کچې له لوړوالي سر ټکوي او له سختو اقتصادي ستونزو سره لاس او ګرېوان دي.
دوی له حکومته غواړي څو په ډېره پیمانه پانګوال د خصوصي سکټور په بیلابیلو برخو کې پانګونې او د کاري فرصتونو ایجاد ته وهڅوي.