تاند (چهارشنبه د حمل ۱۸) ولسمشر محمد اشرف غني وايي چې په کابل کې یې د پروستات عملیات په کامیابۍ سره تېر شول.
ښاغلي غني سه شنبه ماخوستن پر خپله فېسبوک پاڼه د خپل عملیات د کولو خبر خپور کړی دی او ویلي یې دي چي لیکلي دي چې دا عملیات یې په کابل کې د «شهید سردار محمد داود خان په روغتون کې د دغه روغتون د مجربو ډاکترانو له خوا» شوي دي.
نوموړي د دغه روغتون له ډاکترانو مننه کړې چې کامیاب عملیات یې ترسره کړل.
https://www.facebook.com/ashrafghani.af/posts/10158677525738292
خو ولسمشر د خپلې روغتیا په هکله چې اوس څنګه دی، په خپله فېسبوک پاڼه څه دی ویلي او دا هم معلومه نه ده چې ولسمشر له څومره وخت راهېسې د پروستات ناروغي لرله.
د ډاکترانو د معلوماتو پر اساس پروستات یو ډول غده او غوټه ده چې د عمر په تېرېدو سره غټیږي او د انسان د متیازو (باولې) لاره بندوي او ستونزې ورته پیدا کوي.
که څه هم په افغانستان کې دا ډول عملیات د خېټې د څېرې کولو له لارې کیږي، خو معلومه نه ده چې د ولسمشر غني عملیات څه ډول شوي دي، خو په ځینو پرمختللو هېوادونو کې بیا دا ډول عملیاتونه د خیټې له څېرې کولو پرته هم ترسره کېږي.
د یادونې ده چې یو شمېر افغانان د پیچلیو عملیاتو لپاره بهرنیو هېوادونو ته ځي، خو ولسمشر غني په کابل کې د ننه عملیات وکړل.
د نظر خاوندان وايي ولسمشر غني دا عملیات ځکه په کابل کې وکړل چې په کور د ننه په ډاکتراتو د خلکو باور زیات شي او هغه کارونه چې په خپل وطن کې کېدونکي وي نه باید په نورو هېوادونو کې ترسره شي.