تاند(سه شنبه، د حمل ۱۷) د روسیې د بهرنیو چارو وزیر سرګي لاوروف په تازه څرګندونو کې ویلي، څومره چې د افغان سولې په اړه سیمه ییزه اجماع پیاوړې کېږي دومره افغانستان او افغانان سولې ته نږدې کېږي.
د لاوروف په خبره هند په سیمه کې د افغانستان د سولې په برخه کې د مرستندوی په توګه په دې پروسه کې مهم رول لري او باید خپلې هڅې لا ډېرې کړي.
لاوروف زیاته کړې هند د افغان سولې په اړه په سیمه ییزه او نړیواله کچه په جوړوو شوو کنفرانسونو او غونډو کې رغنده رول لوبولی دی او روسیه یې د هڅو ستاینه کوي.
دغه لوړپوړي روسي ديپلومات ویلي چې د افغان سولې لپاره به د سیمه ییزې اجماع په لا پياوړتیا کې هڅه کوي.
تر دې وړاندې روسي چارواکو ویلي وو، هڅه کوي د افغان سولې او دلته د سیاسي حل له درکه هند ته رامنځ ته شوې اندېښنې له منځه یوسي.
په ورته وخت کې د ایران د بهرنیو چارو وزیر ازبکستان ته تللی او هلته یې له ازبکستاني سیال سره د دوه اړخیزو اړیکو د پراختیا تر څنګ پر افغان سولې خبرې کړې دي.
ظریف ویلي چې دوی به د افغانستان د سولې په مسئله کې همکارۍ ډېروي او په دې باور دي چې افغان جګړه یوازې د خبرو له لارې ختمېدلی شي.
ازبکستاني لوري هم ویلي چې دوی تل په افغانستان کې د سولې له پروسې ملاتړ کړی دی او د سیمې له هېوادونو سره په ګډه بیا هم په دې پروسه کې هر ډول اړینو همکاریو ته تیار دي.