تاند ( جمعه، د حمل ۱۳) د ننګرهار په مرکز جلال آباد ښار کې نن له غرمې وروسته شاوخوا درې بجې د جلال آباد ښار اومې ناحیې اړوند دوسرکې سیمه کې د ماین چاودنې له امله پنځه ملکي وګړي ټپیان شوي دي.
د ننګرهار حوزي روغتون مسوولان بیا وایي، چې د پېښې له ځایه ۸ تنه ټپیان ور وړل شوي،چې روغتیایي وضعیت یی د ډاډ وړ دی.
بل لورته لښکرګاه کې ماین چاودنې شپږ سرحدي پولیس وژلي دي.
یوه امنیتي سرچینه وایي چې نن غرمه شاوخوا لس نیمې بجې د هلمند – کندهار پر لویه لاره د سرحدي پولیسو پر موټر د سړک غاړې ماین چاودنه کړې، چې په پایله کې یې د سرحدي ځواکونو شپږ سرتېرو خپل ژوند بایللی دی.
د یادو دواړو چاودنو مسوولیت تر اوسه چا نه دی منلی.
د یادونې ده چې په دې وروستیو کې د هېواد په ولایتونو کې ماین چاودنو زور اخیستی او عام خلک یې هم سخت اندېښمن کړي دي.