تاند (جمعه د حمل ۱۳) هلمند کې د ملکي وګړو په موټر نن غرمه مهال چاودنه شوې چې پنځو کسانو په کې خپل ژوند بایللی دی.
د هلمند د ولایتي شورا رئیس عطاالله افغان ویلي، دغه ماین چاودنه د ۶۰۱ نمبر لویې لارې په چهارګل سیمه کې چې هلمند له کندهار سره وصل کوي، د ملکي وګړو پر موټر شوې ده چې پنځه ملکیان په کې وژل شوي دي.
دده په خبره دغه ماین د وسله والو طالبانو له لوري د ملکي وګړو او امنیتي ځواکونو په نښه کولو په هدف په دې لاره کې ځای پر ځای شوی و.
یوې امنیتي سرچینې بیا د وژل شویو کسانو شمېر اووه تنه یاد کړی دی.
د هلمند د والي ویاند عمر ځواک هم ویلي چې په دې پېښه کې پنځه ملکیان وژل شوي دي.
بله خوا قاري یوسف احمدي چې ځان د طالبانو ویاند بولي، ویلي نن سهار یې د هلمند –کندهار په لویه لاره د افغان ځواکونو په موټر ماین ته چاودنه ورکړې او ویلي یې دي چې په دې چاودنه یې کې یې څلور حکومتي افسران او دوه سرتېري وژلي دي.