تاند ( پنج شنبه، د حمل ۱۲) د هرات امنیتي چارواکي وایي، چې تېره شپه وسله والو طالبانو د دې ولایت په پښتون زرغون، شینډنډ او اوبې ولسوالیو باندې بریدونه کړي.
امنیتي مسوولان وایي د یادو بریدونو په پایله کې ۴ پولیس وژل شوي دي.
د هرات والي سید وحید قتالي وایي، چې طالبانو لومړۍ د شینډنډ ولسوالۍ د امنیت مدیریت ودانۍ ته نیږدې موټر بم الوځولی او وروسته یې له امنیتي ځواکونو سره نښته پیل کړې ده.
د قتالي په خبره له دې برید سره هم هماله طالبانو په پښتون زرغون او اوبې ولسوالیو هم بریدونه کړی، چې د امنیتي ځواکونو له مقاومت سره مخ شوي دي.
نوموړی وایي په دغه برید کې امنیتي ځواکونو ته مرګ ژوبله نه ده اوښتې.
بل لورته د هرات د والي مرستیال نور احمد حیدري وایي، چې نن سهار په دغه ولایت کې د پولیسو پوسته کې ځای پرځای شوي ماین چاودنه کړې.
د هرات امبولانس مسوول ابراهیم محمدي وایي، چې له دغه پېښې څخه یې دوه مړي او یو ټپي روغتون ته لېږدولي.
د یادو دواړو پېښو مسوولیت تر اوسه کومې ډلې نه دی منلی.