تاند (پنجشنبه د حمل ۱۲) نړیوال بانک په افغانستان کې لومړنیو او ثانوي زده کړو ته د ماشومانو په ځانګړې توګه د نجونو د لاسري د زیاتوالي لپاره د ۲۵ میلیون ډالرو اضافي مرستې د تصویب خبر ورکړ.
نړیوال بانک نن پنجشنبه په یوه بیان کې ویلي، دا مرسته له زده کړو سره د همکارۍ د نړیوال پروګرام له لارې کېږي او زیاته کړې یې ده چې له اقراء پروژې سره به په افغانستان کې د سلو نویو ښوونځیو په جوړولو کې مرسته وکړي.
په بیان کې راغلي چې دغه مرسته به د زده کړو د سطحې د لوړوالي، ښوونې او روزنې ته د ماشومانو په ځانګړې توګه د نجونو د لاسرسي د زیاتوالي، د ښوونکو لپاره د روزنیزو پروګرامونو د ملاتړ او په سیمه ییزه کچه د پوهنیزو پروګرامونو د کیفیت د لوړاوي لپاره ولګېږي.
په بیان کې د افغانستان لپاره د نړیوال بانک دفتر رئیس هېنري کرالي له قوله راغلي، افغانستان په تېرو دوو لسیزو کې د زده کړو د کچې د لوړوالي په برخه کې ډېر پرمختګ کړی دی، خو په خبره یې چې لا هم په دغه هېواد کې ۳.۵ میلیونه ماشومان ښوونځي ته له تلو محروم دي او د افغانستان په کچه نیمایي ښوونځي مناسب تعلیمي بنسټونه نه لري.
دغه راز په بیان کې د زده کړو لپاره د نړیوالې همکارۍ پروګرام اجرائیوی مشرې الیس البرایټ د نجونو په پوهنې پانګونه یو خورا اغېزمن ګام بللی او ویلي یې دي چې د نجونو زده کړه د اقتصادي ودې، د ماشومانو د مړینې پېښو د مهارولو او د هغوی د ښې تغذیې لامل کېږي.
نړیوال بانک افغانستان د هغو هېوادونو په قطار کې راوستی چې زیات شمېر زیات شمېر ماشوم په کې زده کړو ته لاسرسی نه لري او زیاته کې یې ده چې د دوی په ګډون ټول پرمختیایي شریکان ژمن دي چې له افغان دولت سره زده کړو ته د لاسرسي د زیاتوالي او د کیفیت د ښه والي په برخه کې همکاري وکړي.