عزیزالله عزیز
فکري بلوغ د انسان لپاره ډير مهم دی!
هره ټولنه کې لوستي کسان هڅه کوي ، چې نورو ته لارښوونه وکړي ، د اصلاح لپاره هرچاته مشوره ورکول ، نیوکه کول یا ورته وړاندېز کول یوه مهمه چاره ده ، خو باید هرڅه ته ډیر فکر وکړو!
چې څه وایو !؟
چاته یې وایو ؟
ایا که په همدې الفاظو ماته یو څه وویل شي، نو زما ضمیر به دا ومني!؟
زه څومره حوصله لرم ، یا باید په کومو ټکو مخاطب ته لارښوونه وکړم ؟
د نیوکې لپاره د داسې لفظونو په لټه کې شئ ، چې د مخاطب زړه مات نشي او نه احساساتي شي!
هیڅکله جدیت او احساساتي چلند مه کوئ!
هغوي ، چې دعصب ته لمن وهي ، نو په لیکنه یې له هر ډول تصبرې تیر شئ ، ترڅو خپله پوی شي ، چې چاته ورته ارزښت ورنکړ !
دلته ځیني اشخاص په لوی لاس په ناپوهۍ یا په قصدي ډول دې کار ته هڅول کیږي !
هغه دوستان ، چې د یو ادرس یا د یوې ټولنې په صفحاتو کې لیکنې کوي باید د خپلې ټولنې ، ارګان ، ادارې یا بنسټ په نماینده ګۍ داسي څه ولیکي ، چې د همغې ادارې یا بنسټ نظر وي ، نه دا چې شخصي نظر او خپل احساسات د ټولنې یا د یوې ادارې په نوم په نورو ورتحمیلوي …چې دا کار ډیر زیانونه لري …..
کله ، چې تاسې د یو مهم ادرس نه یو څه نشر کوئ ، نو فکر وکړئ ، چې ایا د دې ادرس نظر دی که زما شخصي نظر دی ؟
ایا د دې معلوماتو په وړاندې کولو به د خلکو احساسات او غبرګون څه وي!؟
ایا ما د هغه ادرس ، چې زه یې نماینده ګي کوم سمه استازولي کړې که یواځې خپل نظر د دې ادرس په واسطه نورو ته رسوم؟
دغه کړنه ، چې زه یې تر سره کوم زما شخصیت ته څومره زیان یا ګټه رسوي ؟
لفظونه هر څوک لیکلی شي !
خو نادان مخلوق هغه دی ، چې یواځې د نقد ژبه یې تیره وي!
همیش وړو ، وړو نقطو پسې ټینګ نښتی وي !
د ټولنې د بهبود او پرمختګ لپاره یوه جمله هم نشي لیکلی ، خو د کرکې او نفرت لپاره بیا تر چا مخکې وي ….
هغوي ، چې کار کوي !
خدمت کوي !
د ولسونو مشري کوي !
مسولیت ادا کوي !
او د نورو وګړو نماینده ګي کوي ، باید ډیر مخلص او رښتني وي !
تل د نورو خبرو ته غږ شي ، هرچا ته د نظر ورکولو وخت ورکړي او همیشه د نورو نظریاتو ته احترام ولري ….
وخت نا وخت انسان سهوه کیږي ، موږ باید احساساتي چلند ونه کړو!
یو بل ته قناعت ورکول ، زغم او صبر د ویاړلو اشخاصو ځانګړنې دي !
د مشرانو په مخ کې سپین سترګي او شیطاني افکارو ته کار کول جهالت او ناداني ده !
په مستقیم او غیر مستقیم ډول نورو ته ګواښ کول هم د ډارنو او مفسدو اشخاصو ځانګړنه ده !
د ځان د اصلاح او د نورو د سمون لپاره ژور فکر ته اړتیا ده !
راځئ ، چې د خپل ضمیر په هنداره کې د خپلو کړنو ، فعالیتونو او مفکورو انځور ته وګورو ، چې کومې خوبیانې او کومې نیمګړتیاوي لري !؟
د نورو د زوال !
بربادۍ !
توهین !
او مجبوره کولو پر ځای د ځان اصلاح ، پرمختګ او د ټولنې د بریا لپاره خپله وړتیا پکار واچوه او د انسانیت له دایرې د وتلو هڅه هیڅکله هم مه کوه !
2021/4/29
ننګرهار ، د خپلواکو رسنیو ملاتړ اداره.