تاند (دوشنبه د حمل ۹) ولسمشر محمد اشرف غني نن د یوه لوړپوړي دولتي پلاوي په ملتیا د اسیا زړه ـ استانبول پروسې د بهرنیو چارو وزیرانو په نهم کنفرانس کې د ګډون په موخه د تاجکستان په لور وخوځېد.
ارګ نن دوشنبه د یوې خبرپاڼې په خپرولو سره ویلي چې ښاغلی غني به په دې دوه ورځني سفر کې په یاد کنفرانس کې پر ګډون او وینا سربېره د تاجکستان له ولسمشر امام علي رحمان، ددغه هېواد لومړي وزیر او د پارلمان له رئیس سره وګوري او پر بېلو مسایلو به خبرې وکړي.
په خبرپاڼه کې دغه راز راغلي، ولسمشر به د دې سفر په لړ کې د تاجکستان ملي پوهنتون کې وینا وکړي او ټاکل شوې چې دغه پوهنتون ولسمشر غني ته افتخاري دوکتورا هم ورکړي.
د اسیا زړه- استانبول بهير د ۲۰۱۱م عیسوي کال د نومبر په دویمه د ترکیې په پلازمېنه استانبول کې د افغانستان او ترکیې په نوښت جوړ شو .
د دې بهیر یوه موخه په افغانستان کې سوله او د دغه هېواد له څنګلوریو ګاوندیانو سره اړیکي دي چې په کې د ترهګرۍ، نشه يي توکو، او غربت د له منځه وړلو لپاره لارې چارې لټول کېږي.
د اسیا زړه- استانبول بهير ناستو بله موخه هم د سیمه ییزو هېوادونو په منځ کې د باور د زياتولو او په پرمختيايي چارو کې د همکاريو غښتلي کول دي.
د افغانستان پر ګاونډيو او سيمه ييزو هيوادونو سربېره روسيه، هند، سعودي او عربي متحده امارات هم د استانبول بهير غړيتوب لري.
دغه راز د امريکا متحده ايالتونه، برتانيا، د اروپايي ټولنې یو شمېر غړي هېوادونه او ملګري ملتونه د دغه بهیر ملاتړي دي.
د اسيا زړه هېواد کنفرانس نور ګډونوال د ناټو، سارک او ملګرو ملتو په ګډون د ١٢ سيمه ييزو او نړيوالو موسسو استازي دي.