تاند ( یک شنبه د حمل لومړۍ/ ۱۴۰۰) په جلال اباد کې څلورو پرله پسې چاودنو ۷ تنو ته مرګ ژوبله واړوله.
د امنيه قومندانۍ وياند فريدخان وايي، لومړۍ چاودنه د سهار پر اوه بجو د ښار د دويمې ناحيې اړوند کونړي مارکيټ مخې ته شوې، چې په کې يو ملکي وګړى ټپي شوى دی.
هغه وايي، دوهمه چاودنه د سهار پر اوه نيمو بجو د ښار په څلورمه ناحيه کې د کرنې رياست مخې ته شوې، چې له امله يې د جلالآباد د ښاروالۍ يو تن اجير (صفاکار) وژل شوى او يو ټپي شوی دى.
د امنیه قومندانۍ ویاند وايي، دريمه چاودنه د ښار په لومړۍ ناحيه کې د کلچه فروشۍ په کوڅه کې شوې، چې پکې د ښاروالۍ دوه اجيران (صفاکاران) ټپيان شوي دي.
نوموړی وايي، څلورمه چاودنه همدې ځاى کې د ښاروالۍ پر موټر هغه وخت شوې، چې د لومړۍ چاودنې کثافات يې انتقالول.
فريد خان وايي، په څلورمه چاودنه کې هم د ښاروالۍ يو موټر ويجاړ شوى او دوه اجيران پکې ټپيان شوي.
د څلور واړه چاودنو مسوليت تر اوسه کومې ډلې نه دى منلى.
دا چاودنې داسې مهال کېږي، چې نن ۱۴۰۰ کال پيل او د حمل یا وري لومړۍ نېټه ده او د نوي کال د دې ورځ په پار د هېواد په یو شمېر ولایتونو کې په مېلو نمانځل کېږي.