تاند ( شنبه، د حوت ۳۰) د افغانستان د ملي روغې جوړې عالي شورا مشر عبدالله عبدالله د یوې اعلامیې په خپرولو سره د جمهور رئيس له لوري له دندې د کورنیو چارو وزیر مسعود اندرابي ګوښه کېدو سره مخالفت کړی.
عبدالله عبدالله ویلي، پرته له مشورې داسې پرېکړې کول له اوسني وضعیت او ملي ګټو سره په ټکر کې دي.
د عبدالله عبدالله په وینا دا ډول پرېکړې هېڅ دوی ته د منلو نه دي.
نوموړی داسې مهال دا مخالفت ښيي، چې تېره ورځ د جمهور رئيس د حکم پر اساس ستر جنرال محمد یاسین ضیا د ملي دفاع وزارت د سرپرست په توګه وګمارل شو.
دغه راز د کندهار پخوانی والي حیات الله حیات بیا د کورنیو چارو وزارت د سرپرست او جنرال ایوب سالنګی د کورنیو چارو وزارت د لومړي مرستیال په توګه ټاکل شوي دي.