تاند ( شنبه، د حوت ۲۳) د افغانستان د بهرنیو چارو وزارت وايي، افغان حکومت د سولې په تړاو د سیمې هېوادونو له ټولو هڅو ملاتړ کوي.
یاد وزارت زیاتوي ، ټاکل شوې چې په مسکو کې د افغان سولې په اړه جوړېدونکې ناسته کې د حکومت استازي هم برخه واخلي، خو تر دا مهاله په دې ناسته کې د ګډون کوونکو چارواکو نومونه نه دي په ډاګه شوي.
په ورته مهال پخوانی طالب چارواکی عبدالسلام ضعیف بیا وايي، د دې ناستې د جوړېدو نېټه د حکومت او طالبانو سره په مشوره ټاکل شوې او طالبان هم په دې ناسته کې برخه اخلي.
مسکو داسې مهال د افغان سولې مذاکراتو په هدف د جوړېدونکې ناستې کوربه توب لپاره چمتووالی نیسي، چې ټاکل شوې په اپرېل میاشت کې په ترکیه کې د افغان سولې په اړه د ملګرو ملتونو په کوربه توب یوه بله مهمه ناسته ترسره شي.
په ورته مهال روسیې هم تېره ورځ ویلي چې په افغانستان کې د يوه داسې انتقالي حکومت د جوړېدو پلويتوب کوو چې د طالبانو غړي هم پکې شامل وي.
د روسيې د بهرنيو چارو وزارت وياندې ماريا زخاروا زیاته کړې وه چې د يوې ټولشموله موقتې ادارې جوړښت به ښايي دغې ستونزې ته يو منطقي حل وي چې طالبان په سوله ييز ډول د افغانستان سياسي ژوند ته ورګډ شي.
نوموړې ويلي وو چي د مارچ میاشتي پر ۱۸نېټه په مسکو کې د افغانستان په اړه غونډه به د روسيې، امريکا، چين او پاکستان د استازو په سطحه وي.
هغې زياته کړې چې په دې غونډه کې به د بين الافغاني خبرو د پرمختگ، تاوتريخوالي کمولو او وسله والې شخړې د پای ته رسولو په اړه بحث وشي.