تاند (شنبه د حوت ۲۳) د ملګرو ملتونو امنیت شورا یو ځل بیا په افغانستان کې د هدفي وژنو په هکله اندېښنه ښودلې او دا بریدونه یې په سختو ټکو غندلي دي.
د امنیت شورا پرون جمعه د یوې اعلامیې په خپرولو سره ویلي، په دغو بې رحمانه بریدونو کې د ښځو په ګډون ملکي مامورین، قاضیان، خبریالان، روغتیا پالان او مدني فعالان په نښه کیږي.
د امنیت شورا د دغو مخ پر زیاتېدونکو حملو په هکله خواشیني ښودلې او د سملاسي بندولو غوښته یې کړې ده.
په اعلامیه کې دغه راز راغلي چې د دا ډول بریدونو عاملان باید محکمې ته کش شي، خو دا نه ده په ډاګه شوې چې د دغو بریدونو عاملان څوک دي.
د یادونې وړ ده چې تر دې مخکې د افغانستان حکومت او په کابل کې د امریکا سفارت د دا ډول بریدونو مسؤل طالبان بللي، خو یادې ډلې بیا دا څرګندونې رد کړي دي.
د امنیت شورا په اعلامیه کې له ښکیلو خواوو غوښتنه شوې چې ښکیل لوري باید نړیوالو قوانیو ته درناوی ولري، تر څو د ولسي خلکو ژوند تامین شي.
د ملګرو ملتونو د امنیت شورا په داسې مهال په افغانستان کې په هدفي وژنو اندېښنه ښودلې ده چې په تېرو څو میاشتو کې لسګونه، خبریالان، ملکی مامورین، د بشري حقونو فعالان د پلازمېنې کابل په ګډون په مختلفو ولایتونو کې په بېلابېلو بریدونو کې وژل شوي دي.
څو ورځې مخکې په جلال اباد کې د انعکاس په نوم د یوه خصوصي ټلوېزیون درې ښځینه کارکوونکې د وسله والو په برید کې ووژل شوې او له دې پېښې یوه وروسته یوه ډاکتره په دې ښار کې د چسپکي ماین په چاودنه کې ووژل شوه.