تاند (شنبه د حوت ۲۳) د اوبو د چارو د تنظیم ملي اداره په ننګرهار کې د وژل شوي جاپاني الاصله افغان، تتسو ناکامورا د پاتې کارونو د دوام خبر ورکوي او وايي چې په دې ولایت کې د مروارید ۲ کانال پروژې چارې بشپړې او افتتاح شوې.

دغه پروژه د اوبو د چارو د تنظیم ملي ادارې لخوا د اوبو د مدیریت او د کرنیزو ځمکو زیاتوالي په موخه د ننګرهار ولایت په خېوې ولسوالۍ کې تطبیق کیږي.

ددې ادارې په خبرپاڼه کې راغلي چې د دغې پروژې په پلي کولو سره د یاد کانال د اوبو لګولو ظرفیت ۴۹۳ هکتاره لوړ شو، چې ټول ټال به ۸۵۰ هکتاره کرنیزه ځمکه خړوبوي.

د سرچینې د معلوماتو له مخې، له دغه کانال څخه به ۳۳۵۰ کورنۍ ګټه پورته کوي.

د اوبو د چارو د تنظیم ملي اداره په داسې مهال د جاپاني الاصله افغان (ډاکتر تتسو ناکامورا) د نیمګړو کارونو د دوام خبره کوي چې د نوموړي له وژل کېدو وروسته له خلکو سره داسې اندېښنې موجودې وې چې ګوندې د هغه له مرګ وروسته به یې پاتې کارونه سرته ونه رسېږي.

باید وویل شي چې څه موده مخکې ولسمشر اشرف غني هم ویلي و، حکومت ژمن دی چې د ناکامورا نیمګړې پروژې بشپړې کړي.

ښاغلي غني دا خبرې د روان کال د قوس په ۱۴مه د جاپاني بشرپاله ډاکتر تتسو ناکامورا د وژنې د لومړي تلین په مناسبت په یوه ویډیويي پيغام کې کړې وې.

نوموړي ویلي و، «ترهګرو له موږ یو ښکلی انسان واخیست خو د هغه ځلانده میراث او کاري روحیه به د افغانانو د راتلونکو نسلونو په زړونو کې وي.»

د ولسمشر په وینا، د افغانستان حکومت په لویه پکتیا او کابل کې د ځنګلونو، کرنیزې پراختیا او د اوبو د مدیریت په برخه کې د ناکامورا د پروژو عملي کولو ته ژمن دی څو د افغانستان د سمسورتیا لپاره د هغه (ډاکتر ناکامورا) هیلې پوره شي.

ډاکتر تتسو ناکامورا چې کلونه یې د روغتیا، کرنې او اوبو لګولو په برخه کې خدمت کړی و د ۲۰۱۹ کال د ډسمبر په څلورمه په ننګرهار کې د یوه وسله وال برید هدف وګرځېد او د سختو ټپونو له امله یې ساه ورکړه، چې ګڼ شمېر افغانان یې په مرګ خواشیني او دا د افغانستان لپاره یوه لویه ضایع ګڼي.