تاند ( جمعه، د کب ۲۲) خوست ولایت کې د جرګو تالار ته څېرمه لسګونو کسانو د ښاروالي له لوري د هغوی د غرفو د ورانیدو د خبرداري پر وړاندې اعتراض کړی دی.
اعتراض کوونکي وایي، ښاروالي دې برخه کې تعادل ته پام نه کوي او د زورواکو د غرفو د لرې کولو توان نه لري؛ ځکه یې یواځې د غریبو خلکو د غرفو د لرې کولو پرېکړه کړې ده.
دوی وایي، ښاروالي د زورواکو او چارواکو په سلګونو غرفو کار نه لري، خو دوی چې غریب خلک دي، ښاروالۍ خبردارۍ ورکړی، چې د شنبې تر ورځې دې خپلې غرفي تشې او له دې ځایه دې لیرې کړي.
د اعتراض ګډونوال دغه راز زیاتوي چې په ښار کې لاس فروشانو ته ۶ کاله وړاندې د جرګو تالار دریو خواوو ته ۱۶۰ غرفې ویشل شوي او دوی يې ښاروالۍ ته په منظم ډول میاشتني عواید تحویلوي.
د جرګو تالار درې خواوو ته د غرفو مالکان دا هم وایي چې دوی ته یوه میاشت مخکې د یو کال لپاره جوازونه تمدید شوي او دوی يې بانک ته پیسې تحویل کړې دي.
د اعتراض کوونکو په وینا، که ښاروالي د دوی د غرفو د ړنګولو پلان درلود نو بیا يې ولې دوی ته نوي جوازونه ورکړي دي.
اعتراض کوونکو ګواښ وکړ چې که غږ یې وانورېدل شي دوی به خپلو اعتراضونو ته دوام ورکړي.
د خوست ښاروالي تر اوسه په دې اړه وضاحت نه دی ورکړی.
دا په داسې حال کې ده چې د پلازمېنې کابل په ګډون د هېواد په ډېر شمېر نورو ولایتونو کې هم د ښاروالي له لوري د خلکو دا ډول غرفې وخت نا وخت د سړک د پاکوالي او بیروبار د کمېدو په موخه لرې کیږي خو دې برخه کې د ښاروالي په نا انډولۍ د خلکو باور کم شوې او پر وړاندې یې دا ډول اعتراضونه کوي.