تاند ( چهارشنبه، د حوت ۲۰) د افغانستان کرکټ ملي لوبډلې ځوان او پيليز توپوهونکي ابراهيم ځدراڼ د زمبابوې پر وړاندې په دوهمه ټېسټ لوبه کې نیمه سلیزه ووهله.
نوموړى لومړنى افغان توپوهونکى دى چې د زمبابوې پر وړاندې يې په ټېسټ لوبو کې دوه پنځوسيزې وهلې دي.
د افغانستان او زمبابوې ترمنځ په دويمه ټېسټ لوبه کې افغانستان لومړى توپوهنه ترسره کوي چې ابراهيم ځدراڼ پکې په ۱۳۰ توپونو ۷٢ منډې ترسره کړې او وسوځېده.
ابراهيم ځدراڼ د زمبابوې پر وړاندې په لومړۍ ټېسټ لوبه کې په دويمه پاڼۍ کې هم نيمه سليزه يا پنځوسيزه وهلې وه.
د زمبابوې او افغانستان ترمنځ په دوهمه ټېسټ لوبه کې تر اوسه افغان لوبډلې ۱۳۲ منډې کړي او ۳ لوبغاړي یې سوځېدلي دي.
دمګړۍ حشمت الله شهيدي په ۳۰ او اصغر افغان په ۲ منډو توپوهنه کوي.
د يادولو وړ ده چې د ٢ ټېسټ لوبو لړۍ کې په لومړۍ ټېسټ لوبه کې زمبابوې په دويمه ورځ د ١٠ ويکټو په ستر توپير افغان لوبډلې ته ماته ورکړې ده.