تاند(سې شنبه، د حوت۱۹) مارشال عبدالرشید دوستم له څه باندې دوو کلونو وروسته د لومړي ځل په ارګ کې له ولسمشر غني سره ولیدل.
د راپورونو له مخې ولسمشر غني او عبدالرشید دوستم د سولې پر پروسې او د بین الافغاني خبرو د بریالیتوب لپاره د ملي اجماع پر رامنځته کولو خبرې وکړې.
دوی د تېرو دوو لسیزو د بریاوو پر خوندیتوب تاکید وکاوه.
دوستم د کابل او شمالي ولایتونو د امنیت په باب ولسمشر غني ته معلومات ورکړل، ویې ویل چې د دولت له وسله والو مخالفانو څخه د فاریاب- مزارشریف او کندوز – کابل د لویو لارو تصفیه عملي پلانونو ته اړتیا لري.
دوستم په ځلونو د یوه ځانګړي ځواک لپاره د مالي امکاناتو غوښتنه کړې او ژمنه یې کړې چې که حکومت ورسره همکاري وکړي په لنډ وخت کې به ټول شمال له طالبانو او داعشیانو تصفیه کړي.
ولسمشر غني د امنیت د ښه کېدو لپاره د دوستم د پلان هرکلی کړی خو په دې اړه یې په زغرده څه نه دي ویلي چې ایا ده ته به د ځانګړي ځواک د جوړولو مالي او تسلیحاتي امکانات ورکړي او که نه.