تاند (دوشنبه د حوت ۱۸) د افغانستان د بهرنیو چارو وزیر محمد حنیف اتمر وايي چې د سولې پروسې په برخه کې سیمه ييزه اجماع پر خپل ځای ده او هېڅ هېواد نه غواړي چې د طالبانو امارت بیا راشي.
ښاغلي اتمر چې نن یې په کابل کې ملت ته د دولت د حساب ورکولو غونډه کې خبرې کولې وویل، د سیمې هېوادونه او نړیواله ټولنه د طالبانو د امارت مخالف او د جمهوري نظام پلوي دي؛ ځکه په وینا یې، جمهوریت نه یوازې د نړیوالو لپاره یو ارزښت دی، بلکې په ګټه یې هم دی.
نوموړي وویل، د بهرنیو چارو وزارت لومړۍ دنده په هېواد کې د جګړې پای ته رسول او د سولې راتګ دی.
دده په خبره چې د تلپاتې سولې راوستو او د نظام ساتنې په پار یې لومړنی ماموريت د سيمې او نړۍ په کچه د لويې سياسي اجماع رامنځته کول و چې مهمه بېلګه يې د جنيوا کنفرانس دی.
د بهرنیو چارو وزیر دغه راز وویل چې ددې وزارت دويمه لاسته راوړنه د افغانستان د جګړې په تړاو د اسلامي نړۍ اجماع رامنځته کول و چې ددې اجماع په جوړولو سره مو وغوښتل دا ثابته کړو چې د طالبانو جګړه ورور وژنه ده او ديني مشروعيت نه لري.
محمد حنیف اتمر روان تاوتریخوالي ته په کتو وویل چې د نړۍ پنځلسو اسلامي هېوادونو په افغانستان کې روانه جګړه حرامه بللې، نو باید چې دې جګړې ته د پای ټکی کېښودل شي.
د بهرنیو چارو وزیر په خپلو خبرو کې دا هم وویل چې د اقتصادي ډیپلوماسۍ، برېښنا، سوداګرۍ، پانګونې او د افغانستان لپاره د بهرنیو مرستو را جلبولو ډیپلوماسۍ په برخه کې د پام وړ لاسته راوړنې لري.