تاند ( دوشنبه، د کب ۱۸ ) د افغان خبریالانو خوندیتوب کمېټه وایي، د تېرو شپږو میاشتو موده کې افغانستان کې د رسنیو ۳۰۰ ښځینه خبریالانو او کارکوونکو خپلې دندې له لاسه ورکړي، چې ۱۸ سلنه جوړي.
د افغان خبریالانو خوندیتوب کمېټې د ښځو نړیوالې ورځې په مناسبت خپره شوې خبرپاڼه کې ویلي، ښځینه خبریالانو او کارکونکو، د هدفي وژنو، کرونا ویروس، معاش کموالي او د رسنیو مالي ستونزو له امله له خپلو دندو استعفا ورکړې او یا یې هم دندې له لاسه ورکړي دي.
خبرپاڼه وایي، د ۱۳۹۹ کال د لومړيو شپږو میاشتو په ترڅ کې ۱۶۷۸ میرمنو د رسنیو په بیلابیلو برخو کې کار کاوه چې اوس مهال داشمېر ۱۳۷۷ ته راټیټ شوی دی او ۱۸سلنه کموالی ښیي.
د دغې کمېټې د خبرپاڼې د معلوماتو له مخې، د ۱۳۷۷ ښځینه کارکونکو څخه یوازې ۳۲۱ یې خبریالانې دي او پاتې نورې د رسنیو په بېلابېلو برخو کې کار کوي.
سرچینه دغه راز زیاتوي چې نورستان، کونړ، پکتیا، پکتیکا او زابل په ګډون د افغانستان په پنځو نورو ولایتونو کې هېڅ ښځینه خبریاله او کارکوونکې شتون نه لري.
د خبریالانو خوندیتوب کمېټې زیاته کړې، چې په روان کال کې د رسنیو۴ ښځینه کارکونکې په مستقیمو بریدونو کې په نښه شوي او وژل شوي دي چې دې کار په ټول افغانستان کې د ښځینه خبریالانو پر کار منفي اغیزه کړې ده.
دا په داسې حال کې ده چې څو ورځې وړاندې ننګرهار ولایت کې د یو خصوصي ټلویزیون درې ښځینه کارکوونکی د نا څرګندو وسلوالو برید کې ووژل شوې او د خلکو سخت غبرګونونه یې راوپارول.