تاند ( دوشنبه، د حوت ۱۸) د ننګرهار په محبس کې سلګونه بنديان د خياطۍ، ګلدوزۍ، نجارۍ، فلزکارۍ او نورو برخو کې توليدي کار کوي.
مسوولان وایي، دوی د دغو بندیانو په لاس له جوړو شویو توکولاسته راغلې ګټې څخه حکومت ته ټاکلې اندازه ماليه ورکوي.
د ننګرهار د رسنیو دفتر د دې ولايت د زندانانو د چارو د رئیس شاکر احمد له قوله لیکلي چې، په تېرو دوو میاشتو کې بنديانو د خپلو توليداتو لاسته راغلې ګټې څخه ۱۶۰ زره افغانۍ ماليه افغانستان بانک ته سپارلې.
نوموړي هيله ښودلې چې په زندان کې به دا چارې لا ښې شي.
سرچینه زیاتوي چې د ننګرهار په عمومي زندان کې جوړ شوي توکي د ملاقات په ورځ د خلکو مخې ته د پلورولو په موخه ايښودل کيږي او د هر توليد څلويښت سلنه ګټه د زندان صنعت امريت ته ورکول کيږي.
په زندان کې د کسبونو ښوونکي وايې چې د حکومت له لوري د دغه ډول اسانتیاوو برابرولو ورته نه یواځې د بند په موده کې د پام غلطولو زمینه برابره کړې؛ بلکې دوی له همدې ځایه خپلې اړتیاوې پوره کوي او کورنۍ سره هم مرسته کوي.
د یادونې ده، چې د ننګرهار په زندان کې پر کسبونو سربېره د ليک لوست زده کړې، انګلیسي او کمپیوټر درسونه هم ورکول کیږي.