تاند ( شنبه، د کب ۱۶) ننګرهار ولایت کې د یو خصوصي تلویزیون د دریو خبریالانو تر وژل کېدو وروسته د دې رسنۍ ډیری خبریالانو له خپلو دندو استعفاوې کړې دي.
د انعکاس تلویزیون رییس انجنیر زلمی لطیفي وایي چې تېرو دریو ورځو کې د انعکاس تلویزیون شپږو کارکوونکو استعفاوې کړي او دوی یې استعفاوې منظورې کړې دي.
د معلوماتو له مخې، په دغو کسانو کې چې استعفاوې یې کړي د دې رسنۍ د خبر برخې مسوول سمیع الله درانی او د یادې برخې مرستیال وحید الله امان هم شامل دي.
په دغو کارکوونکو کې د انعکاس تلویزیون د ځانګړو راپورونو خبریال جاوید رازمند هم شامل دی.
هغه په دې اړه په خپل فیسبوک لیکلي چې نور یې د انعکاس ټلویزیون سره خپله دنده پای ته رسولې ده.
دا په داسې حال کې ده چې نا څرګندو وسله والو درې ورځې وړاندې د دې تلویزیون درې ښځینه کارکونکې د جلال اباد ښار کې په ډزو ووژلې.
ځینو بهرنیو رسنیو راپور ورکړ چې د یادو کسانو د وژل کېدو پړه داعش ډلې په غاړه اخېستې ده.
د یادونې وړ ده چې شاوخوا درې میاشتې مخکې وسله والو د دغه تلویزیون یوه بله خبریاله ملاله میوند هم وژلې وه.
د ننګرهار والي ضیاء الحق امرخېل هغه وخت ویلي وو چې د ملاله میوند د قتل په تور یې ځینې کسان نیولي دي.
لا معلومات نشته چې دا نیول شوي کسان څوک و او دوسیه یې چېرته رسېدلې ده.