تاند (دوشنبه د حوت ۱۱) د افغانستان حکومت وايي که طالبان اوربند وکړي، نو دوی تیار دي چې د نورو بندیانو پر خوشي کولو غور وکړي.
دغه څرګندونې د سولې په چارو کې د دولت وزیر پرون یکشنبه ملت ته د دولت د حساب ورکولو په پروګرام کې وکړې او وې وویل، د افغانانو تر ټولو ستره هیله دا وه چې د بندیانو تر خوشي کولو وروسته به په افغانستان کې اوربند رامنځ ته کېږي او جګړې به کمېږي.
د سید سعادت مصنور نادري په خبره چې یو کال د امریکا او طالبانو د هوکړې وشو، خو د افغانانو لپاره یې هېڅ ګټه نه ده لرلې.
ښاغلي نادري د خبریالانو د پوښتنو په ځواب کې وویل، لا هم د افغانانو ستره غوښتنه اوربند دی او که طالبان د بندیانو خوشي کول غواړي نو لومړی باید اوربند وکړي.
نوموړي زیاته کړه، «د بندیانو په خوشي کولو کې د خلکو غوښتنه اوربند و چې دغه کار لا تر اوسه نه دی شوی. موږ اوس اوربند غواړو او مشران به د پاتې بندیانو د خوشي کولو په اړه پرېکړه وکړي.»
د نادري په خبره، د دوحې هوکړه افغانانو ته مهمه نه وه، ځکه د افغانانو پر ژوند یې هېڅ اغېز نه درلود او جګړې یې کمې نه کړې.
د سولې په چارو کې د دولت وزیر خپلو راتلونکو پروګرامونو ته په اشارې وویل چې ۱۴۰۰ م کال د سولې کال په نوم نومول یوه هڅه ده تر څو د دولتي بنسټونو پروګرامونه پر سوله راوڅرخېږي او ولایتونو ته د سولې پیغام رسونه پراخه شي.
نوموړي زیاته کړه په دې کال کې به د سولې روزنیز پروګرامونه عملي شي او همدا راز له جګړې په اغېزمنو سیمو کې به د بیا ادغام پروګرامونه جوړ او عملي شي. د سولې په چارو کې د دولت د وزیر په خبره چې ددې پروګرامونه د عملي کولو پلان جوړ شوی دی.