تاند ( شنبه، د حوت ۹) د انګلینډ او نیوزیلینډ ښځینه کرکټ ملي لوبډلو تر منځ د درېو پنځوس اوریزو سیالیو سیریز انګلینډ دوه د صفر په مقابل کې په خپل نوم کړ.
د دواړو لوبډلو تر منځ دوهمه لوبه تېره ورځ د فبرورۍ په ۲۶مه نېټه تر سره شوه چې په دغه سیالۍ کې نیوزیلينډ ښځېنه کرکټ لوبډلې لومړی توپ وهنه وکړه او د ټولو لوبغاړو په سوځېدو يې ۱۹۲ منډې جوړې او سیالې لوبډلې ته يې د ۱۹۳ منډو هدف ورکړ.
انګلینډ لوبډلې ټاکل شوی هدف د لوبې په ۳۸م اور کې د درېیو لوبغاړو په زیان تر لاسه کړ او په ۷ ویکټو يې مقابلې لوبډلې ته ستره ماتې ورکړه.
له دې وړاندې لومړۍ لوبه هم انګلینډ لوبډلې ګټلې وه.
د دې لوبې په ګټلو سره یادې لوبډلې د روانو لوبو لړۍ په خپل نوم کړه.
یاده دې وي چې له وروستۍ یو ورځنۍ سیالۍ وروسته به د دواړو لوبډلو تر منځ درې شل اوريزې سیالۍ هم تر سره شي.
لومړۍ شل اوریزه سیالۍ يې د راتلونکي مارچ میاشتې په ۳مه ، دوهمه يې په ۵مه او وروستۍ هغه يې بیا په ۶مه نېته تر سره کیږي.