تاند (پنجشنبه د حوت ۷) په افغانستان کې په لومړي ځل د سرتېرو په ژوند د فلمونو درې ورځنۍ فېسټیوال پیل شو.
د فلمونو دغه فېسټیوال د افغان فلم ادارې لخوا د افغان ځواکونو د ملاتړ لپاره جوړ شوی، چې په کې لسګونه داسې فلمونه جایزې ته نوماند دي چې د افغان سرتېرو ژوند په کې انځور شوی دی.
په دې درې ورځني نندارتون کې چې ګڼ شمېر جګپوړو افغان چارواکو او لسګونو امنیتي او دفاعي ځواکونو ګډون کړی و د چهارشنبې په شپه په کابل کې پیل شو او تر شنبې به دوام وکړي.
د افغانستان د اطلاعاتو او فرهنګ وزارت هم د فلمونو په دغه نندارتون کې ښکیل دی چې د افغان امنیتي او دفاعي بنسټونو مالي ملاتړ له ځانه سره لري.
داسې معلومېږي چې د افغانستان حکومت اوس سینما ته د تبلیغاتو د یوې مهمې دستګاه په توګه ګوري او د همدې لپاره یې د سرتیرو په ژوند د فلمونو دې نندارې ته تیاری نیولی.
د افغان فلم مشرې صحرا کریمي ویلي، اوس ددې وخت رارسېدلی چې د افغان ځواکونو اصلي ژوند او سرښندنو ته کتنه وشي.
د ښاغلې کریمي په خبره، دې فېسټیوال ته ۵۵ فلمونه ور لېږل شوي چې له ډلې به يې ۴۰ هغه په بېلابېلو برخو کې سیالۍ ته وړاندې شي.
د افغان سرتېرو په ژوند ښه فلم جوړونکي به ددغه فېسټیوال پر درېیمه ورځ په ډاګه شي.
د یاد نندراتون د جوړونکو د معلوماتو له مخې، غوره فلم جوړونکو ته نغدي او معنوي جایزې هم په پام کې نیول شوي دي.
د سرتېري په نوم د فلمونو دا نندارتون د راتلونکي شنبې په ورځ چې د حوت میاشتې له نهمې نېټې سره برابره ده او په پلان کې ده چې افغان حکومت یې د سرتېرو د ملي ورځ په توګه ولمانځي، پای ته رسیږي.
د حوت نهمه له تېرو څو کالونو راپدېخوا د افغان امنیتي او دفاعي ځواکونو او د دوی کړنو ته د درناوي په موخه په ټول افغانستان کې نمانځل کېږي.