تاند (دوشنبه د حوت ۴) د افغانستان د ملي دفاع وزرت په کندهار ولایت کې د څلورو پاکستانیانو په ګډون د ۱۰ وسله والو طالبانو د وژل کېدو خبر ورکړ.
د دفاع وزارت نن دوشنبې په یوه خبرپاڼه کې ویلي، افغان کمانډو ځواکونو د هوايي ملاتړ پر مټ د کندهار په ارغستان ولسوالۍ کې د وسله والو طالبانو د ماین جوړونې په کارخانو او ډیپوګانو عملیات تر سره کړل.
په خبرپاڼه کې راغلي، په دغو عملیاتو کې د څلورو پاکستاني ماین جوړونکو په ګډون ۱۰ تنه وسله وال طالبان ووژل شول.
د ملي دفاع وزارت وايي، پر دې سربېره په هوايي بریدونو کې د طالبانو د ماین جوړولو یوه کارخانه او زېرمه هم له منځه وړل شوې.
طالبانو تر اوسه په دې هکله څه نه دي ویلي.