تاند (شنبه د حوت ۲) د افغانستان ولسمشرۍ ماڼۍ د هرات ولایت د ګازرګاه جومات د خطیب مولوي مجیب الرحمان انصاري د څرګندونو په غبرګون کې ویلي چې د هېواد د امنیتي او دفاعي ځواکونو په اړه د نوموړي څرګندونې ستره ګناه ده.
د ولسمشر د ویاند مرستیال دواخان مینه پال پر خپل ټویټر لیکلي، امنیتي او دفاعي ځواکونه د هېوادوالو او خاورې مقدس ساتونکي دي او شپه او ورځ د هغوی د ارامتیا او ساتنې لپاره هلې ځلې کوي.
ښاغلي مینه پال زیاته کړې، د افغان ځواکونو په هکله د انصاري څرګندونې عظیمه ګناه ده.
دافغانستان امنیتي او دفاعي سرتیري بشپړ مسلمانان، داسلام دپنځو بنأ و پالونکي او ساتونکي دي، ددوی مبارزه او سرښیندني سپېڅلي او شرعي دي، داسلامي جمهوریت دساتونکو پر خلاف هرډول څرګندوني غیري شرعي او ستره ګناه ده.
— Dawa khan Menapal (@menapal1) February 20, 2021
مولوي انصاري په هرات کې د جمعې لمانځه په خطبه کې له اوسني نظام څخه ملاتړ کبیره ګناه بللې او له امنیتي ځواکونه څخه یې غوښتنه کړې چې د دې نظام باید ملاتړ ونه کړي.
د نوموړي دغو خبرو د ولسمشرۍ ماڼۍ سربېره د ګڼ شمېر خلکو غبرګونونه هم راپارولي دي.
د ټولنیزو رسنیو کاروونکو د نوموړي دغه څرګندونو غندلي او د نظام او وطن پر زیان یې بللي دي.