تاند(پنج شنبه، د دلوې ۳۰) ملي دفاع وزارت ویلي، امنیتي ځواکونو د زابل ولایت میزان او ارغنداب ولسوالیو کې د یو لړ ځانګړو عملیاتو په ترڅ کې ۲۸ وسله وال طالبان ووژل.
له ملي دفاع وزارت په خپره شوې خبرپاڼه کې راغلي، تېره ورځ دفاعي او امنیتي ځواکونو د هوايي قواوو په ملاتړ د زابل ولایت د ارغنداب او میزان ولسوالیو اړوندو سېمو کې طالبان په نښه کړې دي.
خبرپاڼه زیاتوي، ددغو بریدونو په پایله کې، ۲۸ وسلهوال طالبان وژل شوي، او پنځه نور ټپیان شوې دي.
د خبرپاڼې په وینا، دغه بریدونو کې د وسله والو طالبانو یو شمېر درنې او سپکې وسلې هم د امنیتي ځواکونو لاس ته ورغلي دي.
دا په داسې حال کې ده چې په دې وروستیو کې په هېواد کې جګړه شدیده شوې او د هدفي وژنو ترڅنګ په ولایتونو کې د طالبانو او امنیتي ځواکونو ترمنځ نښتې کېږي چې دواړه لوري یو بل ته د زیاتې مرګ ژوبلې اړولو ادعاوې کوي.