تاند ( سه شنبه، ددلوې ۲۸) د افغانستان دکرکټ ملي لوبډلې لوبغاړى محمد نبي عیسی خېل هم د پاکستان په سوپر ليګ کې د ګډون لپاره یاد هېواد ته لاړ.
نبي وروستى افغان لوبغاړى دى چې پاکستان ته روان شوى، تر هغه مخکې نور څلور لوبغاړي هم پاکستان ته رسېدلي دي.
نوموړي د پي اېس اېل په لوبو کې له کراچۍ کنګز لوبډلې سره لوبېږي.
محمدنبي تازه په ټويټر کې هم خپل يو عکس خپور کړى دى چې په الوتکه کې ناست دی.
د پاکستان سوپر ليګ د شپږم پړاو سيالۍ د فبرورۍ په ٢٠مه نېټه په کراچۍ کې پيلېږي.
په یاد لیګ کې محمد نبي له کراچۍ کنګز ، راشد خان د لاهور قلندرز، مجيب الرحمن د پېښور زلمي، قېس احمد د کوټې ګليډيټرز او نور احمد لکڼوال هم د کراچۍ کنګز لوبډلې لپاره لوبېږي.