تاند (شنبه د دلوې ۲۵) د جرمني د بهرنیو چارو وزیر وايي، سرتېري به یې تر هغه وخته پورې په افغانستان کې پاتې شي څو پورې چې بین الافغاني مذاکرات یوې مثبتې پایلې ته نه ويرسېدلي.
د هایکو ماس په خبره، مخکې له دې چې په افغانستان کې یې د سرتېرو ماموریت پای ته ورسېږي باید تمدید شي.
د فونکي میډیا ګروپ د هایکوماس په حواله خبر ورکړی چې ښایي د افغان حکومت او طالبانو ترمنځ د سولې روان مذاکرات تر مارچ مياشتې پورې کومې پایلې ته ونه رسېږي، نو ددغه هېواد د سرتېرو د ماموريت موده دې هم وغځول شي.
نوموړي زیاته کړې چې جرمني غواړي دغه ماموریت د ایتلافي ملګرو سره یو ځای په مسؤلانه توګه پای ته ورسوي څو د سولې پروسه له ګواښ سره مخامخ نه شي.
جرمني په افغانستان کې شااوخوا ۱۳۰۰ سرتېري لري چې د ناټو د غوڅ ملاتړ د ماموریت په چوکاټ کې فعالیت کوي.
د هایکو ماس دا وړاندیز باید د جرمني پارلمان تصویب کړي.