تاند ( جمعه، د دلوې ۲۴) د افغانستان د اوبو د چارو تنظیم ملي اداره وايي، لغمان ولایت کې د عبدالرحیمزي د اوبو د کانال کارونه بشپړ او تېره ورځ ترې د خلکو ګټنه پیل شوه.
د دغې ادارې له لوري په خپره شوې خبرپاڼه کې ویل شوي، یاده پروژه د نړيوال بانک په مالي مرسته د کرنیزو ځمکو خړوبولو، د موسمي سیلابونو مخنیوي او خلک وته د کارموندنې په موخه په لغمان ولایت کې بشپړه شوې ده.
د ياد ادارې د معلوماتو له مخې عبدالرحیمزي کانال په جوړېدو سره د ۲۰ زره هکټاره په شاوخوا کې کرنیزه ځمکه خړوبیږي او دغه راز شاوخوا ۵ زره کورنۍ به ترې ګټه پورته کوي.
دا په داسې حال کې ده چې د اوبو د چارو د تنظیم ملي ادارې لخوا په لغمان ولایت کې د شاهي کانال چارې هم په چټکۍ روانې دي چې په ټاکلې نيټه به یې کارونه بشپړ شي.