تاند ( چهارشنبه، د دلوې ۲۲) د کندهار ولایت د صنعت او سوداګرۍ ریاست مسوولین وايي چې تېر کال له دې ولایته نورو هېوادونو ته ۱۹۹ زره ټنه وچه او تازه مېوه صادره شوې ده.
دوی وايي چې د یاد ولایت مڼې، کشمش او وچ انځر پاکستان او هندوستان او همدا راز د هوايي دهلېزونو له لارې اروپايي هېوادونو ته صادر شوي دي.
د سرچېنې د معلوماتو له مخې، سږ کال د کرونا ویروس او قرنطینونو له امله دا اندازه لږه کمه شوې ده.
د سرچېنې په وینا، روان لمریز کال کې د کرونا ویروس له اوج وروسته ۱۲۴ زره ټنه وچه او تازه مېوه له دې ولایته نورو هېوادونو ته صادره شوې ده چې د تېر کال په پرتله کموالی ښيي.
سرچینه دغه راز زیاتوي چې د یاد کموالي یواځېنی علت د کرونا وبا راتګ وو او اوس چې یې ګواښ کم شوی نو حالت بېرته د ښه کېدو په لور روان دي.
د کندهار د صنعت او سوداګرۍ ریاست مسوولین همدا راز وايي، دوی هڅه کوي چې د کندهار د محصولاتو لپاره په کور دننه هم بازارونه پیدا کړي.