تاند (سه شنبه د دلوې ۲۱) په لوګر ولایت کې د یوه لوی نړیوال هوايي ډګر د سروې چارې پیل شوې.
دغه هوايي ډګر د کابل په سوېل ۴۰ کیلومټرۍ کې د لوګر د محمد اغې ولسوالۍ د دولت کلا په دښته کې جوړېږي.
د لوګر والي عبدالقیوم رحیمي وايي، دغه نړیوال هوايي ډګر محمداغې ولسوالۍ کې په ۲۰ زره جریبه ځمکه کې جوړېږي چې د توپوګرافي چارې يې نن رسماً پیل شوې.
ښاغلي رحیمي د لوګر ولایت ټولو امنيتي او دفاعي ځواکونو ته لارښوونه وکړه چې د محمداغې ولسوالۍ په دولت دښته کې د جوړېدونکي هوايي ډګر امنیت خوندي او هیچاته یې د مخنیوي اجازه ور نه کړي.
نوموړي نن سه شنبه د یوې خبري ناستې پر مهال وویل، ددې هوايي ډګر د جوړېدو د امنیت لپاره د ملي اردو یوه لېوا ځانګړې شوې چې ټول لوګر په ځانګړي ډول د دولت کلا په شاوخوا ۲۰ کیلومټرۍ کې ځای پر ځای شوې ده.
د لوګر ولایت اوسېدونکي له طالبانو غواړي چې ددې ولایت هوايي ډګر د جوړېدو برخه کې همکاري وکړي، څو دغه ملي پروژه په بریالیتوب سره بشپړه شي.
د معلوماتو له مخې په لوګر کې د نوي هوايي ډګر جوړېدل به شاوخوا یوه لسیزه وخت ونیسي چې ۸۰۰ میلیون ډالره لګښت به پرې راشي.
د لوګر ولایت اوسېدونکي هم خوښ دي چې د دغه هوايي ډګر له جوړېدو سره سم به افغانان له امنيتي، سیاسي او اقتصادي اسانتیاوو برخه من شي.