تاند ( دوشنبه، د دلوې ۲۰) د افغانستان د صنعت او سوداکرۍ وزارت مسوولان وایي چې په کندوز ولایت کې د وریجو د پروسس په برخه کې پانګونه ډېره شوې ده.
یاد وزارت وایي چې په دې ولایت کې د شعیب فیصل په نوم د وريجو د پروسس او بسته بندۍ فابریکه چې په ۱۳۸۸ لمریز کال یې د یو ملیون ډالرو په لومړنۍ پانګونې سره خپل فعالیت پیل کړی وه اوس یې خپله پانګونه ۵ میلیونو ډالرو ته لوړه کړې ده.
د ياد وزارت د معلوماتو له مخې دا فابریکه په یوه ورځ کې ۱۴۰ ټنو وریجې پروسس او بسته بندي کوي.
سرچینه زیاتوي چې دغه راز په دې فابریکه کې د کندز ولایت۲۲۰ تنو اوسیدونکو ته هم د کار زمینه برابره شوې ده.
د صنعت او سوداګرۍ وزارت وايې،د وريجو یاده فابریکه خپل محصولات د کندز ولایت سربیره ګاونډیو ولایتونو کې هم پلوري او ګاونډي هیواد تاجکستان ته يې هم صادروي.
کندز په شمال ختیځ کې یو له هغه ولایتونو څخه دی چې، د وريجو د بیلابیلو ډولونو کښت پکې ځانګړی شهرت لري.
کرنیز پوهان هم دا ډول پانګونې د هېواد په ګټه بولي .
دوی وایي په دې سره به هم عامو خلکو ته کاري زمینه برابره شي او هم په دې برخه کې ځان بسیاینې لور ته ګام واخلي.